Komiteti është një grup pune këshillues dhe koordinues i kryesuar nga Ministri i Financave dhe Ekonomisë, që ka si objektiv përmirësimin e procesit të politikës tregtare dhe lehtësimin e tregtisë, nëpërmjet dialogut mes përfaqësuesve të qeverisë, komunitetit të biznesit në Shqipëri dhe grupeve të tjerë të interesuara.

Objektivi kryesor i Komitetit është të veprojë si një forum për përmirësimin e procesit të politikave tregtare dhe zbatimit të tyre, lehtësimit të tregtisë, dhe përcaktimin e drejtimeve kryesore të lehtësimit të tregtisë.

Objektivat specifike të Komitetit janë:

• Të ofrojë një forum kombëtar konsultimi e koordinimi për përmirësimin e procesit të politikë-bërjes në fushën e tregtisë ndërkombëtare (aspekti i përmirësimit të procesit të politikës së tregtisë ndërkombëtare);
• Të ofrojë një forum kombëtar konsultimi dhe koordinimi për lehtësimin e procedurave dhe dokumentacionit që përdoret në tregtinë ndërkombëtare, transportin, tranzitin, logjistikën, financat dhe çështje të tjera të lidhura me tregtinë ndërkombëtare (aspekti i lehtësimit të tregtisë);
• Të bëjë rekomandime për akte ligjore e nën-ligjore në fushat e përmendura më lart (aspekti rregullator);
• Të bëjë rekomandime politikash për investimet e mundshme që lidhen me tregtinë (aspekti i objektivave të zhvillimit);
• Të rrisë ndërgjegjësimin mbi metodat dhe përfitimet e masave që lidhen me lehtësimin e tregtisë (aspekti i përhapjes së informacionit dhe zhvillimit të kapaciteteve);
• Të mbështesë negociatat për lehtësimin e tregtisë në nivel dy-palësh, rajonal dhe shumëpalësh (aspekti i objektivave të negocimit);
• Të monitorojë zhvillimet e politikës tregtare dhe ti përshtatë ato me zhvillimet e tregtisë ndërkombëtare (aspekti i monitorimit).